Shaxsiy ma’lumotlarning maxfiylik siyosati

2026-yil 23-iyundagi tahrir

1. Bu hujjat nima haqida?

Shaxsiy maʼlumotlarning maxfiylik siyosatining (keyingi oʻrinlarda — “Siyosat”) vazifasi — bizga tegishli boʻlgan veb-saytlarga tashrif buyurganingizda yoki biz taqdim etadigan onlayn xizmatlardan (keyingi matnda birgalikda — “Ozon Servislari”) foydalanganingizda shaxsiy maʼlumotlaringizni qayta ishlash tartibi va shartlarini tushuntirishdan iborat.

Agar bu siz bilan munosabatlarimizga nisbatan qoʻllaniladigan shaxsiy maʼlumotlar toʻgʻrisidagi qonunchilikka (keyingi oʻrinlarda — “Amaldagi qonunchilik”) zid boʻlmasa, ushbu Siyosat shaxsiy maʼlumotlar subyektining shaxsiy maʼlumotlarini qayta ishlashga, shu jumladan ularni yigʻishga roziligi ham hisoblanadi.

Biz Siyosatni vaqti-vaqti bilan sizni bu haqda alohida xabardor qilmasdan yangilashimiz mumkin, uning amaldagi sanasi esa har doim bevosita sarlavha ostida koʻrsatiladi. Ehtimolli oʻzgartirishlarni kuzatib borish uchun ushbu sahifani vaqti-vaqti bilan koʻrib turishni tavsiya qilamiz.

2. Shaxsiy maʼlumotlar va ularni qayta ishlash nima?

Shaxsiy maʼlumotlar (shaxsiy axborot, shaxsga doir maʼlumotlar, shaxsiy xususiyatga ega maʼlumot va hokazo) — bu jismoniy shaxs va Ozon Servislari foydalanuvchisi sifatida sizga bevosita yoki bilvosita aloqador boʻlgan har qanday maʼlumot. Ayrim hollarda Amaldagi qonunchilik ushbu tushunchaga aniqlik kiritishi hamda ayrim maʼlumotlar toifalariga (masalan, foydalanuvchi qurilmalari haqidagi texnik maʼlumotlarga) nisbatan uning doirasini toraytirishi yoki kengaytirishi mumkin. Shunga qaramay, biz shaxsiy maʼlumotlar jumlasiga qanday maʼlumotlar kiritilishini belgilashda imkon qadar keng yondashuvga amal qilamiz.

Shaxsiy maʼlumotlarni qayta ishlash — bu shaxsiy maʼlumotlar bilan amalga oshiriladigan har qanday harakat (operatsiya), jumladan ularni yigʻish, jamlash, saqlash, oʻzgartirish, toʻldirish, ulardan foydalanish, uchinchi shaxslarga berish (tarqatish, taqdim etish, ularga kirish imkonini berish), bloklash, oʻchirish va yoʻq qilish.

Bunda shaxsiy maʼlumotlaringiz bilan amalga oshiriladigan muayyan harakatlar (operatsiyalar) qaysi Ozon Servisidan foydalanishingizga bogʻliq. Ular haqida qayta ishlash boshlanishidan oldin tegishli yuridik hujjatlar (ofertalar, foydalanish shartlari va hokazo) yoki foydalanuvchi interfeysi elementlari orqali sizga maʼlum qilinadi (masalan, Ozon Servisida toʻldirish uchun shakl mavjudligi shaxsiy maʼlumotlaringizni yigʻishimizni anglatadi).

3. Shaxsiy maʼlumotlaringizni kim qayta ishlaydi?

Ozon — sizga tegishli Ozon Servislarini taqdim etadigan kompaniyalar guruhining umumiy nomi. Bu shaxsiy maʼlumotlaringizni Ozon tomonidan qayta ishlaydigan muayyan shaxs (kompaniya) sizga muayyan Ozon Servisini qaysi kompaniya taqdim etishiga qarab belgilanishini anglatadi.

Agar Siyosat matnida boshqacha qoida toʻgʻridan-toʻgʻri nazarda tutilmagan boʻlsa, Ozonʼning tegishli kompaniyasi operator, ya’ni shaxsiy maʼlumotlaringizni qayta ishlashni mustaqil ravishda tashkil etadigan va/yoki amalga oshiradigan, shuningdek shaxsiy maʼlumotlarni qayta ishlash maqsadlarini, qayta ishlanadigan shaxsiy maʼlumotlar tarkibini hamda bunday shaxsiy maʼlumotlar bilan amalga oshiriladigan muayyan harakatlarni (operatsiyalarni) belgilaydigan shaxs hisoblanadi.

Tegishli Ozon Servisining yuridik hujjati (oferta, foydalanish shartlari va hokazo) yoki foydalanuvchi interfeysidagi maʼlumotlar orqali operator kimligini mustaqil ravishda aniqlashingiz mumkin. Masalan, veb-saytlarimizning quyi qismida (“futer”da) ularni Ozon kompaniyalaridan qaysi biri boshqarishi haqida maʼlumot koʻrsatilgan.

Ozon ID — yagona kirish texnologiyasi

Foydalanuvchidan oldindan avtorizatsiyadan oʻtish talab qilinadigan ayrim Ozon Servislarida biz yagona kirish texnologiyasi — Ozon IDʼdan foydalanamiz, uning egasi — “Internet Resheniya” MChJ hisoblanadi. Bu shuni anglatadiki, Ozon ID yordamida istalgan Ozon Servisida avtorizatsiyadan oʻtganingizda, shaxsiy maʼlumotlaringiz operatori sifatida kamida Ozon ID egasi boʻlgan “Internet Resheniya” MChJ hisoblanadi. Ozon IDʼdan foydalanish shartlari bilan quyidagi havola orqali tanishishingiz mumkin.

Agar Ozon ID yordamida avtorizatsiyadan oʻtilayotgan tegishli Ozon Servisi “Internet Resheniya” MChJga emas, balki Ozonʼning boshqa kompaniyasiga tegishli boʻlsa, boshqa Ozon kompaniyasi ham sizga oʻz Ozon Servisini taqdim etish doirasida shaxsiy maʼlumotlaringiz operatori hisoblanadi. Oʻz Ozon Servislarida avtorizatsiya usuli sifatida Ozon IDʼdan foydalanadigan Ozon kompaniyalari roʻyxati bilan ushbu havola orqali tanishishingiz mumkin (“Affillangan shaxslar” tushunchasiga qarang).

Ozon Servislari

Xususan, agar yuridik hujjatlar yoki foydalanuvchi interfeysida boshqacha qoida toʻgʻridan-toʻgʻri nazarda tutilmagan boʻlsa, quyidagi Ozon kompaniyalari shaxsiy maʼlumotlaringiz operatorlari sifatida ishtirok etishi mumkin:

Biz vaqti-vaqti bilan yangi Ozon Servislarini ishga tushirishimiz, shu jumladan boshqa mamlakatlar hududida yangi marketpleyslarni taklif qilishimiz mumkin. Bunday holatlarda, agar yuridik hujjatlar yoki foydalanuvchi interfeysida boshqacha qoida toʻgʻridan-toʻgʻri nazarda tutilmagan boʻlsa, shaxsiy maʼlumotlaringiz operatorlari ushbu boshqa mamlakatlardagi Ozon kompaniyalari boʻladi.

Boʻsh ish oʻrinlari va hamkorlik boʻyicha boshqa takliflar

Rossiyada boʻlgan shaxslar uchun moʻljallangan Ozon boʻsh ish oʻrinlari yoki Ozon bilan hamkorlik boʻyicha boshqa takliflarga javob berganingizda, shaxsiy maʼlumotlaringiz Ozonʼning bosh kompaniyasi sifatida “Internet Resheniya” MChJ tomonidan xodimlarni yollash va hamkorlarni tanlash jarayonini boshqarish maqsadida qayta ishlanadi. Bunda “Internet Resheniya” MChJ boʻsh ish oʻrinlari yoki hamkorlik boʻyicha taklifga javob berishda koʻrsatgan shaxsiy maʼlumotlaringizni siz bilan tegishli shartnoma tuzishni rejalashtirayotgan Ozon kompaniyasiga berishga haqli hisoblanadi. Agar bunday Ozon kompaniyasi siz bilan shartnoma tuzsa, u ham shaxsiy maʼlumotlaringizni qayta ishlaydi.

Rossiyadan tashqarida boʻlgan shaxslar uchun moʻljallangan Ozon boʻsh ish oʻrinlari yoki Ozon bilan hamkorlik boʻyicha boshqa takliflarga javob berganingizda, shaxsiy maʼlumotlaringiz siz bilan tegishli shartnoma tuzishni rejalashtirayotgan Ozon kompaniyalari tomonidan qayta ishlanadi. Bunday Ozon kompaniyalari boʻsh ish oʻrinlari yoki hamkorlik boʻyicha taklifga javob berishda koʻrsatgan shaxsiy maʼlumotlaringizni Ozonʼning bosh kompaniyasi sifatida “Internet Resheniya” MChJga berishga haqli. “Internet Resheniya” MChJ ushbu shaxsiy maʼlumotlarni xodimlarni yollash va hamkorlarni tanlash jarayonini boshqarish maqsadida qayta ishlaydi.

Mustaqil operatorlar

Ozon kompaniyalari bir-biriga nisbatan mustaqil operatorlar ekaniga eʼtibor bering. Bu Ozonʼga shaxsiy maʼlumotlarga oid biror-bir talab yuborganingizda, ushbu talab aynan qaysi operatorga yuborilganini koʻrsatishingiz kerakligini anglatadi.

Xususan, agar shaxsiy maʼlumotlaringiz bir nechta operator tomonidan qayta ishlansa va tegishli talabni faqat bitta operatorga yuborsangiz, boshqa operatorlar bunday talabga muvofiq hech qanday harakatni amalga oshirmaydi, chunki ushbu talab ularga yuborilmagan. Agar bir vaqtning oʻzida bir nechta operator talablaringizni bajarishini istasangiz, bunday talablar bilan har bir operatorga alohida murojaat qilishingiz lozim.

Tegishli operator bilan bogʻlanish uchun ushbu operatorning shaxsiy maʼlumotlarni qayta ishlashga oid siyosatida koʻrsatilgan aloqa maʼlumotlaridan foydalaning (“Shaxsiy maʼlumotlar subyektlarining huquqlari” boʻlimiga qarang).

4. Ushbu Siyosat shaxsiy maʼlumotlarga oid boshqa hujjatlar bilan qanday bogʻliq?

Siyosat Ozonʼning shaxsiy maʼlumotlarga oid boshqa yuridik hujjatlari (masalan, shaxsiy maʼlumotlarni qayta ishlashga oid siyosatlar, shaxsiy maʼlumotlarga oid shartlarni oʻz ichiga olgan ofertalar va hokazo) bilan birgalikda qoʻllaniladi.

Agar ushbu Siyosatda, Ozonʼning shaxsiy maʼlumotlarga oid boshqa yuridik hujjatlarida yoki Amaldagi qonunchilikda boshqacha qoida toʻgʻridan-toʻgʻri nazarda tutilmagan boʻlsa, Siyosat bunday yuridik hujjatlarga nisbatan maxsus xususiyatga ega. Bu, umumiy qoidaga koʻra, qarama-qarshiliklar yuzaga kelgan taqdirda ushbu Siyosat ustuvor kuchga ega boʻlishini anglatadi.

Siyosat bilan tartibga solinmagan qismda Ozonʼning shaxsiy maʼlumotlarga oid tegishli yuridik hujjatlari, shu jumladan Ozon Servislarini taqdim etuvchi tegishli Ozon kompaniyalarida qabul qilingan va ularga havolalar Siyosatning oldingi boʻlimida koʻrsatilgan shaxsiy maʼlumotlarni qayta ishlashga oid siyosatlar qoʻllaniladi.

5. Shaxsiy maʼlumotlaringizni kimga uzatamiz?

Ozon doirasida

Sizga Ozon Servislarini taqdim etish zarur boʻlgan hollarda, shu jumladan foydalanuvchi tajribasini yaxshilash va ushbu Ozon Servislaridan foydalanish sifatini oshirish maqsadida shaxsiy maʼlumotlaringizni Ozon kompaniyalari oʻrtasida uzatamiz. Sizga Ozon Servislarini taqdim etish bilan bogʻliq ayrim funksiyalar (masalan, Ozon Servislari infratuzilmasini joylashtirish yoki ularni texnik qo‘llab-quvvatlash) ham Ozonʼning ayrim kompaniyalariga topshirilishi mumkin. Bu bunday Ozon kompaniyalari tegishli funksiyalarni bajarishda shaxsiy maʼlumotlaringizdan foydalanish imkoniga ega boʻlishini anglatadi.

Ozonʼdan tashqarida

Quyidagi hollarda shaxsiy maʼlumotlaringizni Ozonʼdan tashqariga uzatamiz:

• siz bilan turli shartnomalarni, shu jumladan ayrim Ozon Servislaridan foydalanish shartlarini tuzish va bajarish doirasida;

• tegishli Ozon kompaniyasiga nisbatan qoʻllaniladigan va undan muayyan hajmda shaxsiy maʼlumotlarni oshkor etishni talab qiladigan qonunchilik talablarini bajarish uchun (masalan, soliq organlarining talabi yoki sudning soʻrovi boʻyicha);

• roziligingiz bilan;

• Amaldagi qonunchilikka muvofiq boshqa huquqiy asoslar mavjud boʻlganda.

Shaxsiy maʼlumotlaringizni oluvchilar toifalari

Muayyan holatlar va siz foydalanadigan Ozon Servislariga qarab, biz shaxsiy maʼlumotlarni uzatadigan Ozonʼdan tashqaridagi shaxslar jumlasiga veb-saytlarimiz va mobil ilovalarimizda toʻlovlarni amalga oshiradigan banklar, oʻz qoidalariga muvofiq buyurtmalarni yetkazib beradigan pochta aloqasi operatorlari, biz ularga buyurtmalarni rasmiylashtirish va yetkazib berish uchun aloqa maʼlumotlaringizni beradigan marketpleyslarimizdagi sotuvchilar, oʻz vakolatlari doirasida shaxsiy maʼlumotlarni soʻraydigan davlat organlari va boshqalar kiradi. Bunday shaxslar shaxsiy maʼlumotlarni Ozon nomidan yoki uning manfaatlarini koʻzlab qayta ishlamaydi, chunki ular bunday qayta ishlash uchun oʻz maqsadlari va huquqiy asoslariga ega (masalan, ekvayer banklar bank qonunchiligi talablariga muvofiq toʻlovlarni qabul qiladi, Ozon esa ularning faoliyatiga aralashishga haqli emas).

Bank kartasi orqali amalga oshirilgan toʻlovga eʼtiroz bildirish (charjbek) tartib-taomilini boshlasangiz, tegishli nizoni koʻrib chiqish doirasida biz bahsli buyurtma va uni rasmiylashtirish holatlariga oid maʼlumotlarni ushbu buyurtma boʻyicha tranzaksiyani avval qayta ishlagan ekvayer bankka ham beramiz. Dalillarni har tomonlama va xolis oʻrganish imkoniyatini taʼminlash, shuningdek Ozon, isteʼmolchilar va sotuvchilarning huquqlari hamda qonuniy manfaatlarini amalga oshirish uchun Ozon tegishli maʼlumotlarni daʼvo muddati davomida saqlaydi.

Shuningdek, aloqa maʼlumotlaringizni hamkorlarimizga (uyali aloqa operatorlari, ijtimoiy tarmoqlar egalari, tezkor xabar almashish servislarini tashkil etuvchilar (messenjerlar), shuningdek boshqa aloqa kanallari provayderlariga) berishimiz mumkin. Bu Ozon Servislaridan foydalanishingiz bilan bogʻliq axborot xabarlarini ushbu hamkorlar orqali sizga oʻz vaqtida yuborish uchun zarur. Masalan, buyurtma olib ketish uchun tayyor boʻlishi bilan, agar VK foydalanuvchisi boʻlsangiz, bu haqda sizga VK ijtimoiy tarmogʻida tegishli xabar yuboramiz.

Shuningdek, shaxsiy maʼlumotlaringizni qayta ishlashni bir yoki bir nechta Ozon kompaniyasiga, shuningdek, ular bilan tuziladigan shartnomalar asosida boshqa uchinchi shaxslarga topshirishimiz mumkinligiga rozilik bildirasiz. Bu tegishli Ozon kompaniyasi oʻz funksiyalarining bir qismini ushbu Ozon kompaniyasi nomidan yoki uning manfaatlarini koʻzlab ish yuritadigan muayyan shaxsga topshirishini anglatadi.

Xususan, tegishli natijaga erishish uchun zarur bilim yoki resurslarga ega boʻlmaganimizda (masalan, Ozon Servislarini ishlatish uchun qoʻshimcha hisoblash quvvatlari zarur boʻlsa, oʻz serverlarimiz mavjud boʻlmaganda uchinchi shaxsdan ajratilgan serverlarni ijaraga olishimiz mumkin) yoki oʻz mehnat sarflarimiz va faoliyat sifati nuqtayi nazaridan ayrim funksiyalarni autsorsingga topshirish samaraliroq boʻlganda, topshiriq asosida Ozonʼdan tashqaridagi shaxslarni jalb qilamiz. Bunday shaxslarga, masalan, xosting xizmatlari provayderlari (xosting-provayderlar), kontakt-markaz xizmatlari provayderlari, agentlik buyurtmalarni berish punktlari va kuryerlar kiradi.

Shuningdek, sizga yuboriladigan/koʻrsatiladigan reklamani shaxsiylashtirish, bunday reklama samaradorligini baholash, foydalanuvchi tajribasini yaxshilash va Ozon Servislaridan foydalanish sifatini oshirish uchun maʼlumotlaringizni uchinchi shaxslarga (masalan, reklama tarmoqlariga) berishga haqlimiz.

Huquqlarimiz va qonuniy manfaatlarimizni himoya qilish va/yoki amalga oshirish uchun zarur boʻlganda, siz haqingizdagi maʼlumotlarni tekshirish maqsadida tashqi servislardan foydalanishimiz va bunday maʼlumotlarni ularga berish orqali uchinchi shaxslarni jalb qilishimiz mumkin. Shu tariqa, biz, masalan, moliyaviy va yuridik xavflarni aniqlaymiz va bartaraf etamiz, Ozon Servislari foydalanuvchilarining firibgarlik yoki boshqa insofsiz xatti-harakatlariga qarshi kurashamiz hamda Ozon Servislariga nisbatan yuzaga kelishi mumkin boʻlgan axborot xavfsizligi tahdidlarining oldini olamiz.

Muayyan holatlar va siz foydalanadigan Ozon Servislariga qarab, maʼlumotlarni transchegaraviy tarzda, yaʼni siz turgan mamlakat hududidan tashqariga berishimiz mumkin. Masalan, bu marketpleyslarimizdagi buyurtmalar uchun xorijiy toʻlov tizimlari kartalari orqali toʻlov qilganingizda yoki buyurtmani siz turgan mamlakat hududidan tashqariga yetkazib berishni rasmiylashtirganingizda yuz beradi.

6. Shaxsiy maʼlumotlaringizni qayerdan olamiz?

Bevosita sizdan

Ozon Servislaridan foydalanganingizda, biz shaxsiy maʼlumotlaringizni boshqa manbalardan emas asosan bevosita sizdan olamiz. Shu sababli, shaxsiy maʼlumotlaringizni bizga taqdim etish yoki etmaslikni oʻzingiz hal qilishga haqlisiz.

Masalan, ayrim Ozon Servislaridan yanada shaxsiylashtirilgan tarzda foydalanish uchun (masalan, sizga eng yaqin buyurtma topshirish punktini aniqlash maqsadida) bizga joylashuvingiz (geolokatsiya) haqidagi maʼlumotlardan foydalanish imkonini berishingiz mumkin. Biroq bunday imkoniyatni taqdim etishdan bosh tortishingiz tegishli Ozon Servisidan foydalanish imkoniyatingizni cheklamaydi.

Quyidagi hollarda biror-bir shaxsiy maʼlumotlarni taqdim etishingiz shart emas:

• qonunchilikda talab qilinmasa (masalan, sizni kredit tashkilotining mijozi sifatida identifikatsiya qilishimiz yoki marketpleysdagi sotuvchi sifatida maʼlumotlaringizni isteʼmolchilarga yetkazishimiz zarur boʻlganda); yoki
• Ozon Servislaridan ularning funksional maqsadiga muvofiq foydalanish uchun talab qilinmasa (masalan, Ozon ID orqali foydalanuvchini avtorizatsiya qilish uchun telefon raqamingiz, buyurtmalarni kuryer orqali yetkazib berish uchun esa manzilingiz zarur).

Biroq shaxsiy maʼlumotlarni taqdim etishga qaror qilsangiz, bunday maʼlumotlarning aniq, toʻliq, ishonchli va dolzarb ekanini kafolatlaysiz. Agar Amaldagi qonunchilikda boshqacha qoida toʻgʻridan-toʻgʻri nazarda tutilmagan boʻlsa, Ozon taqdim etilgan maʼlumotlarning aniqligi, toʻliqligi, ishonchliligi va dolzarbligini tekshirish boʻyicha sizning oldingizda hech qanday majburiyatni oʻz zimmasiga olmaydi.

Uchinchi shaxsning shaxsiy maʼlumotlarini taqdim etish orqali, siz, shuningdek ushbu shaxsning shaxsiy maʼlumotlarini Ozonʼga berish va keyinchalik Ozon tomonidan qayta ishlashga amaldagi roziligi mavjudligini kafolatlaysiz.

Uchinchi shaxslardan

Yuridik hujjatlar yoki foydalanuvchi interfeysida toʻgʻridan-toʻgʻri nazarda tutilgan hollarda shaxsiy maʼlumotlaringizni uchinchi shaxslardan olamiz.

Xususan, ayrim Ozon Servislarida foydalanuvchilarga turli shakl va anketalarda oʻz maʼlumotlarini soddalashtirilgan tarzda toʻldirish imkoniyati taklif qilinishi mumkin — bunda kerakli maʼlumotlar tashqi manbadan olinadi va ularni qoʻlda kiritish talab etilmaydi. Bunday imkoniyatdan foydalanishni istalgan vaqtda rad etishingiz va tegishli maʼlumotlarni mustaqil ravishda kiritishingiz mumkin.

Istalgan Ozon Servisida Ozon ID yordamida avtorizatsiyadan oʻtganingizda, tegishli Ozon kompaniyasi sizga ushbu Ozon Servisini taqdim etish uchun Ozon IDʼdagi maʼlumotlarni “Internet Resheniya” MChJdan oladi.

Shuningdek, sizga yuboriladigan/koʻrsatiladigan reklamani shaxsiylashtirish, bunday reklama samaradorligini baholash, foydalanuvchi tajribasini yaxshilash va ushbu Ozon Servislaridan foydalanish sifatini oshirish uchun siz haqingizdagi maʼlumotlarni boshqa manbalardan olishga haqlimiz.

Huquqlarimiz va qonuniy manfaatlarimizni himoya qilish va/yoki amalga oshirish uchun zarur boʻlganda, siz haqingizdagi maʼlumotlarni olish maqsadida tashqi servislardan foydalanishimiz va uchinchi shaxslarga murojaat qilishimiz mumkin. Shu tariqa, biz, masalan, moliyaviy va yuridik xavflarni aniqlaymiz va bartaraf etamiz, Ozon Servislari foydalanuvchilarining firibgarlik yoki boshqa insofsiz xatti-harakatlariga qarshi kurashamiz hamda Ozon Servislariga nisbatan yuzaga kelishi mumkin boʻlgan axborot xavfsizligi tahdidlarining oldini olamiz.

Metrik dasturlar yordamida

Quyida bayon etilganidek, ayrim hollarda shaxsiy maʼlumotlaringizni ayrim Ozon Servislarida qoʻllaniladigan metrik dasturlar yordamida avtomatik ravishda olamiz. Bunday maʼlumotlar bilan ishlash uchun cookie fayllaridan foydalanamiz.

Cookie fayllari — veb-sahifani koʻrish vaqtida qurilmangizga (kompyuter, smartfon va hokazo) yuklanadigan va muayyan maʼlumotlarni oʻz ichiga olgan kichik fayllar. Shu sababli, qurilmangizda turli cookie fayllari saqlanishi mumkin.

Cookie fayllari veb-saytlarga (ilovalarga) foydalanuvchi qurilmalarini aniqlash, foydalanuvchilarning afzal koʻrgan sozlamalarini belgilash, shuningdek veb-saytdan (ilovadan) foydalanish tajribasini yaxshilash yoki vaqti-vaqti bilan yuzaga kelishi mumkin boʻlgan turli xatolar yoki nosozliklarni bartaraf etish uchun foydalanuvchilarning veb-saytlar (ilovalar) bilan qanday oʻzaro aloqada boʻlishi haqidagi statistik maʼlumotlarni toʻplash imkonini beradi. Bunda cookie fayllaridan foydalanish zarur boʻlgan maqsadlar roʻyxati cheklangan emas va foydalanuvchi tashrif buyuradigan yoki boshqa usulda foydalanadigan muayyan veb-saytga (ilovaga) bogʻliq.

Siyosat maqsadlari uchun veb-trekerlar, piksellar va shu kabi texnologiyalar ham cookie fayllari sifatida tushuniladi. Biz cookie fayllaridan Ozon Servislarining muayyan foydalanuvchisi sifatida shaxsingizni aniqlash uchun hech qachon foydalanmaymiz.

Xususan, biz quyidagi cookie fayllaridan foydalanamiz:

Istalgan vaqtda veb-brauzeringiz sozlamalari orqali cookie fayllarini oʻrnatishni mustaqil ravishda cheklashingiz yoki butunlay oʻchirib qoʻyishingiz mumkin. Buni qanday amalga oshirish haqida maʼlumot olish uchun quyidagi havolalardan foydalaning:

• Internet Explorer
• Microsoft Edge
• Safari
• Google Chrome
• Firefox

Texnik cookie fayllaridan foydalanilmasa, Ozon Servislari notoʻgʻri ishlashi, ularning ayrim funksiyalari, shu jumladan asosiy funksiyalari ishlamasligi mumkinligiga eʼtibor bering.

Agar Ozon Servislaridan foydalanish uchun mobil ilovalarimizdan foydalansangiz, bunday ilovalarning foydalanuvchi interfeysi orqali qurilmangizga oʻrnatilgan uchinchi tomon mobil ilovalaridan qanday foydalanishingiz haqidagi maʼlumotlarni toʻplashimizga ruxsat berishingiz mumkin. Olingan maʼlumotlardan yuqoridagi jadvalda bayon etilganidek, nimalarni afzal koʻrishingizni tahlil qilish, tahliliy maʼlumotlarni shakllantirish va marketing maqsadlarida foydalanamiz. Qurilmangizda tegishli sozlamalarni tanlash orqali mobil ilovalarimizga bunday maʼlumotlardan foydalanishni istalgan vaqtda taqiqlashingiz mumkin.

Mobil ilovalarimiz tegishli funksiyalarni taqdim etish uchun uchinchi tomon kodidan (masalan, tashqi SDK yoki kutubxonalar koʻrinishida) foydalanishi mumkin (masalan, uchinchi tomon servislaridan foydalangan holda ilovada toʻlovlarni amalga oshirish imkonini berish uchun). Bunday holda maʼlumotlaringiz ham koʻrsatilgan maqsadda qayta ishlanadi.